%20(1)%20(1).gif)
काठमाडौं, भदौ ६। जिल्ला प्रशासनले निषेधाज्ञा आह्वान गरेपछि देशैभर इन्धनको माग ह्वात्तै घटेको छ । मोफसलमा आह्वान भएको निषेधाज्ञाका कारण इन्धनको माग घटेकामा राजधानीमा पनि सोही क्रमले निरन्तरता पाएको हो ।
नेपाल आयल निगमको वाग्मती प्रादेशिक कार्यालय तथा थानकोट डिपो प्रमुख प्रदीप यादवका अनुसार शुक्रबारका लागि १४० किलोलिटर पेट्रोल तथा १६३ किलोलिटर डिजेलको माग आएको छ । शुक्रबार आएको माग सामान्य अवस्थाको २० प्रतिशत मात्र भएको यादवले जानकारी दिए ।
डिपो बिहीबार बन्द थियो भने भोलि शनिबार पनि बन्द रहनेछ । यसको अर्थ शुक्रबारको बिक्री शनिबारसमेतका लागि हुनेछ ।
प्रादेशिक कार्यालयबाट बुधबार ३ लाख ७० हजार लिटर पेट्रोल र ३ लाख ९१ हजार लिटर डिजेल बिक्री भएको छ । सामान्य अवस्थामा यहाँबाट ८ लाख लिटर पेट्रोल र ७ लाख लिटर डिजेल बिक्री हुन्छ ।
डिपो प्रमुख यादवले माग भएअनुसारै इन्धन बिक्री गरिने बताए । डिपोबाट राजधानीसहित नजिकका जिल्लाका व्यवसायीलाई तेल बिक्री हुन्छ । बिहीबार राजधानीका अधिकांश पेट्रोल पम्प बन्द थिए ।
अमलेखगन्ज डिपोबाट हुने इन्धन बिक्रीका लागि पनि माग ह्वात्तै घटेको छ । डिपो प्रमुख भरत रेग्मीका अनुसार अहिलेको माग सामान्य अवस्थाको तुलनामा ६० प्रतिशतले घटेको छ ।
जिल्ला प्रशासनले निषेधाज्ञा जारी गर्दा अमलेखगन्जबाट बिक्री हुने जिल्लामा माग घटेको छ । रेग्मी भन्छन्, “सामान्य अवस्थामा साढे २ लाख लिटर पेट्रोल बिक्री हुने गरेकामा १ लाखमा झरेको छ । डिजेलको माग २० लाख लिटरबाट हिजो ३ लाख लिटरमा आइपुगेको छ ।”
भैरहवाको माग ५ लाख लिटर डिजेल र १ लाख ८० हजार लिटर पेट्रोल रहेकामा अहिले घटेर ३ लाख १२ हजार र १ लाख २० हजार कायम भएको छ ।
अत्यावश्यक वस्तुअन्तर्गत पर्ने इन्धनको ढुवानीमा देशैभर सहज छ भने आयात पनि निरन्तर रहेको नेपाल आयल निगमका प्रवक्ता विनितमणि उपाध्याय बताउँछन् । उनका अनुसार बिहीबार रक्सौलबाट ८ लाख ५२ हजार लिटर डिजेल र ३ लाख ८४ हजार लिटर पेट्रोल तथा २ लाख ६० हजार लिटर हवाइ इन्धन नेपालका लागि लोड भएको छ ।
खाना पकाउने एलपी ग्यासको आायत पनि निरन्तर छ । बिहीबारै १२ बुलेट एलपीजी वीरगन्ज नाकाबाट आयात भएको छ । बुधबार ४० बुलेट आयात भएको प्रवक्ता उपाध्यायले बताए ।
देशैभरका प्रशासनले इन्धनलाई अत्यावश्यक वस्तु मानेर यसका ढुवानीमा रोक लगाएका छैनन् । आयात नियमित रहेको तथा भैरहवाबाहेक निगमका सबै डिपो यथावत् अवस्थामा सञ्चालनमा रहेका कारण अत्यावश्यक वस्तु इन्धनको समस्या नहुने उपाध्याय बताउँछन् ।
आयत र ढुवानीसँगै आपूर्ति पनि सहज छ । माग घटेर बिक्री घटे पनि निगमका सबै डिपो खुला छन् ।
भैरहवा डिपोमा कर्मचारीलाई कोभिड(१९ संक्रमण पुष्टि भएपछि सो डिपो हालका लागि बन्द छ । सो डिपोबाट आपूर्ति हुने इन्धन अहिले अमलेखगन्ज डिपोबाट हुने व्यवस्था मिलाइएको छ ।
भैरहवा डिपोका कर्मचारीको कोरोना पुनः जाँच तथा डिपोको निर्मलीकरण गरी सञ्चालनमा ल्याउने योजना निगमको छ । थानकोट डिपो दिन बिराएर खोलिएको छ भने अमलेखगन्ज डिपो नियमित सञ्चालनमा छ । अन्य स्थानमा आपूर्ति सहज छ ।
निगमको केन्द्रीय कार्यालयबाट अत्यावश्यक सेवा मात्र प्रवाह भइरहेको छ । न्यूनतम कर्मचारी अत्यावश्यक कामका लागि मात्र कार्यालय आउने गरेको प्रवक्ता उपाध्यायले बताए । उनका अनुसार कार्यकारी निर्देशकको कार्यालय, नायब कार्यकारी निर्देशकहरुको कार्यालय, प्रशासन, केही अत्यावश्यक विभाग सीमित कर्मचारीबाट सञ्चालित छ ।
0 coment rios: